APPLLAC's Aims and Objectives

اکیڈمی فار دی پروموشن آف پنجابی لینگوئج، لٹریچر، آرٹ اینڈ کلچر - ایپلیک دا پروگرام

پنجاب نہ معلوم ویلیاں توں اک تاریخی ،لسانی ،ثقافتی،معاشی ،روحانی تے جغرافیائی اکائی اے ۔ ایپلیک دے پلیٹ فارم اُتوں بلھے تے فریداں دی زبان بولن تے فکر رکھن والا سالم پنجاب ہی ساڈی اصل منزل ہے ۔ پنجاب وچ وسدی لوکائی اک پنجابی قوم ہے ۔ جہدی ماں بولی پنجابی ہے جیڑی پنجاب دی قومی زبان وی ہے۔ پنجابی زبان نوں ودھاوا دین لئی ،ماں بولی نوں پنجاب وچ ایدا آئینی،قانونی تے جماندرو حق دوان لئی تے پنجاب دی لسانی تے جغرافیائی وحدت تے سا لمیت نوں برقرار رکھن تے ایدے حقاں لئی پنجاب دی لوکائی تے خاص کرکے نویں نسل نوں جاگرتی دین تے منظم کرنا ساڈا مشن ہے ۔حق،سچ ،برداشت،عدم تشدد، امن،بھائی چارہ تے ڈائیلاگ دی راہ تے ٹردیاں اسیں پنجاب تے پنجابی نوں درپیش مسئلے حل کرن تے ایدے حق لین دے چاہ وند ہاں۔جہدے لئی اساڈا سولہ نکاتی پروگرام کجھ انج دا ہے:

(1)پنجابی زبان نوں پنجاب دی مڈھلی لازمی تعلیمی زبان دا حق دوان دے نال نال پنجابی نوں پنجاب دی سرکاری،دفتری،عدالتی زبان بنان لئی رائے عامہ نوں تیار تے منظم کرنا

(2)پنجاب دے کالجاں تے یونیورسٹیاں وچ استاداں تے پاڑھواں نوں پنجابی زبان تے ایدے حقاں بارے جاگرتی دین تے پنجاب دی تریخی تے قومی پچھان تے پچھوکڑ نال جوڑن لئی چیپڑ قائم کرنا۔

(3) پنجاب دی سا لمیت دی راکھی نالے پنجاب تے پنجابی بارے قومی شعور،جانکاری تے پنجابی ایکتا نوں ودھاوا دین لئی ایپلیک دے پلیٹ فارم توں کانفرنساں،سیمینار،ادبی بیٹھکاں،فکری مجلساں،ٹاکرے ،کتاب میلے،عوامی میلے ،اکٹھ تے کلچرل شوزدا پربندھ کرنا۔

(4)پنجاب دے سارے شہراں،تحصیلاں تے ضلعیاں وچ پنجابی زبان،ادب،آرٹس تے رہتل تے ودھا لئی کم کرنا

(5)پنجاب دے ہر ضلعے تے تحصیل وچ ایپلیک دے چیپٹرقائم کرنا

(6)پنجابی کتاباں،رسالے،نیوز میگزین تے پرکھ پڑچول والے لیکھ تے کتاب لڑیا ںچھاپن والیاں نوں ہلا شیری دینا۔نالے بہترین پنجابی ادب لکھن والیاں ، پنجابی ادب نوں ودھاوا دین تے نویں لکھاریاں نوں ہلا شیری دین لئی ورہے وار نقد انعام تے ایوارڈ دین سلسلے شروع کرنا

(7)نویں نسل نوں اپنی ماں بولی نال جوڑی رکھن لئی سارے پنجاب وچ ماں بولی وچ مضمون نویسی تے انعامی مقابلے تے جیتوواں لئی انعام دین والے پکے سلسلے۔

(8)سارے پنجاب وچ سرکاری تے پرائیویٹ سطح تے پنجابی پرائمری سکولاں،ہائی سکولاں،کالجاں تے یونیورسٹی دے قیام لئی تحریک چلانا۔

(9)پنجابی لینگوئج اتھارٹی،پنجابی یونیورسٹی،پنجابی چینل تے پنجابی اخبار چالو کران لئی سرکار کولوں فنڈز رکھوان تے ضروری قانون سازی کروان لئی مہم چلانا۔

(10)پنجابی پرنٹ تے الیکٹرانک میڈیا اسارن لئی سرکار تے پرائیوٹ سیکٹر نوں لابئینگ کرنا۔

(11)پنجابی زبان لئی کم کرن والے اداریاں دی گرانٹ ودھان لئی سرکار نوں چیتا کراندے رہنا۔

(12)پاکستان دیاں چارے صوبیاں تے قومی زباناں سندھی،پشتو،بلوچی تے پنجابی نوں اک دوجے دے نیڑے لیان لئی پنجاب وچ انٹر پروونشل ڈائیلاگ نوں ہلا شیری دین لئی پنجاب وچ کانفرنساں تے سیمناراں دا پر بندھ کرانا۔

(13) چارے صوبیاں دے صوفیاں دی فکر نوں ودھاوا دین لئی پنجاب وچ صوفی کانفرنساں تے انٹرپراونشل ڈائیلاگ دا پربندھ کرانا

(14) ایپلیک دی فکر نوں ساری دنیا وچ وسدے پنجابیاں وچ ودھاوا دینا

(15) پنجاب تے پنجابی نوںدرپیش مسئلیاں دا حل ڈھونڈھن لئی ایپلیک دے پلیٹ فارم توں پنجابی قومی کانفرساں دا پربند ھ کرنا۔

(16) پنجابی لکھن،پڑھن تے بولن لئی اپنی ماں بولی کولوں دور ہوندے لوکاں نوں ہلا شیری دین لئی سارے پنجاب وچ جاگرتی دی مہم